تجربتي الاولى مع دراجات الشارع

السلام عليكم ورحمة الله وبركاته

:

أسعد الله اوقاتكم بكل خير، ان شاء الله اكون ضيف خفيف عليكم، اولاً راح اعرف بنفسي، انا راكان زابن، العمر ٢٥ سنه، طالب في السنه الاخيره في كلية الطب.

بدأت مشوار الرياضه والهوس بالجسم الصحي قبل ٧ سنوات، كنت مع اصحابي في ثيم بارك في نيويورك، وكان جسمي وقتها مو صحي ابدا (( سمين )) وركبت معاهم في الـ roller-coaster او بالعاميه (( قطار الموت )) ولكن للاسف مصخرت نفسي قدام البشر ههههه لأن الهاندل حقت الامان (( اللي تقفل على الشخص لحمايته من السقوط )) ماقفلت بسبب وجود كتله تعيقها (( الكرشه ههههه )) انحرجت حرج فضيع والناس يضحكوا ويأشروا. ولكن الحمدلله اخذتها بإيجابيه، وبدأت مشواري في الحصول على جسم صحي… والحمدلله من ١٣٠ كيلو ونسبة الدهون 55% .. الى ٨٢ كيلو ونسبة الدهون 12% .الله يديم الصحه والعافيه علينا جميعا.

:

 

خلال السنوات اللي فاتت كنت مركز على الركض بالاضافه الى السباحه، ولكن وصلت مرحلة الملل، ومشاكل في المفاصل بسبب الركض (( مفصل الركبه والقدم )) .. كنت اركض مسافات طويله واتبع نظام الـ HIIT او High intensity intervals training لأنه يحرق الدهون ولا يخسرك عضلات  Muscle wasting .. الفكره في التمرين هذا ان الجسم ياخذ كمية اكسجين كبيره (( فوق حاجته )) فـبعد التمرين الجسم يستمر يحرق هذا الاكسجين عن طريق الأيض، بمعنى ان الـ BMR او الـ basal metabolic rate يرتفع بسبب وجود الاكسجين الزايد، هذا الظاهره طبياً اسمها (( ِ Excess post-exercise oxygen consumption EPOC )). والجسم علشان يحرق الاكسجين الزايد، يحتاج الـ fatty acids من تكسير الدهون في جسمنا.

:

 

بما اني مليت من الركض، اقترح لي احد الشباب من امريكا اني اجرب الدراجات، واستخدم نفس فكرتي في الركض (( HIIT )) على الدراجه، وفكرت في الموضوع، وقرأت كثير عن محاسن الدراجات، ولكن كنت حاط يدي على قلبي من المضايقات في الشوارع من اخواننا اللي مزحهم ثقيل. ولكن توكلت على الله وكلمت الاخ حسام وتعبته معاي بكثر الاسئله (( سامحني حسام هههههه والله انك صبور ماشاء الله عليك )) وكان بلسم بالاجوبه وقمه في الاخلاق والتعامل.

:

واشتريت الدراجه، وركبتها بنفسي الحمدلله (( بعد اصابات عديده في اماكن متعدده هههههه )) وواجهت مشكله في وزن السرج (( المقعد )) ولكن كلمت حسام ومشى معاي خطوه خطوه الين وزنته صح.. بعدها نفخت الكفرات الى 110PSI وانتظرت الشمس تغيب استعداداً لأول تجربه.

:

غابت الشمس وقرأت كل الادعيه (( خوفاً من المضايقات ههههه )) وتوكلت على الله، انطلقت بالبدايه بسرعه بطيئه وتدرجت لأقصى سرعه قدرت عليها، وكان شعور لا يوصف، اول شي قلته بنفسي (( حسافة الايام اللي ضيعتها بالركض وآلم المفاصل والفكس ولصقات العضلات هههههه )) ولكن مازلت خايف من المضايقات، وبعد ١٠ كيلو من المتعه طحت في وسط المدينه وهنا بدأت فوبيا المضايقات، ولكن الحمدلله الناس كانوا راقين لأبعد درجه، ومافيه مضايقات ابدا واكثر من شخص وقفني يسألني عن اماكن شراء الدراجات وكانوا متحمسين للفكره.

:

 

كملت ٢٠ كيلو من الـ HIIT على الدراجه، ورجعت البيت بإبتسامه عريضه، لأنني لقيت رياضه ممتعه جدا وبنفس الوقت تساعد على جسم صحي.

:

نقاط عن رحلتي البسيطه:

المسافه: ٢٠ كيلو تقريبا.
السرعه: اتنقل بين اسرع سرعه اقدر عليها، الى ابطأ سرعه (( نفس مبدأ الـ HIIT )).
نبضات القلب: اعلى شي قدرت اوصل له هو 85%.
BMR: ارتفع الى 2400 كالوري تقريبا. القياس كان بعد التمرين بـ ١٥ دقيقه.

 

الاستعدادات اللي سويتها قبل الرحله:

١- ماء بارد
٢- اكلت شوفان بار (( energey bar )) طبيعي مصنوع من الشوفان وبذور الكتان (( flax seeds )) تعطي طاقه وتخفض الكوليسترول LDL وترفع الـ HDL.
٣- اخذت معاي بار في الشنطه (( احتياط علشان لو تعبت او جاني إعياء )).
٤- تمارين التمدد والتسخين علشان الشد العضلي.
٥- قرأت الأدعيه وتوكلت على الله.

اللي ماعجبني في التجربه:
١- السرج (( المقعد )) متعب بعد اول ٥ دقايق من الركوب (( حتى بعد وزن الارتفاع )) ولكن الحل اني اشتري شورت فيه padding مصنوع من جل (( foam cells )) على حسب كلام اللي مجربين انه يشيل ٩٥٪ من هذا الالم.
٢- بعض الطرق اللي دخلت فيها كانت مكسره وتعبتني.

التغييرات في الرحلات القادمه:
١- راح البس الشورت اللي فيها بطانه (( علشان الألم ))
٢- راح اركب عداد سرعه ومسافات
٣- اضاءه امامية

والحمدلله ان التجربه عدت بسلام وكانت من اروع التجارب اللي عشتها، والشكر لأخوي حسام اللي كان معاي خطوه بخطوه، واعتذر منكم بسبب عدم وجود صور عن الرحله، ولكن اوعدكم راح انزل صور في التجارب القادمه

هذي صوره لدراجتي العزيزة بعد التركيب وقبل التجربه

20140813_205537

اعتذر على الإطاله، وفقكم الله لما فيه الخير

Related Posts

4 Responses
  1. عبدالإله الملحم

    عاشوووو طلاب الطب ….
    راااائع مقابلة رائعه وثرية بالمعلومات
    ننتظر باقي تجاااااااربك 🙂